Արարատ կոնյակի համտեսի միջոցառում Վիեննայում

19 նոյեմբերի, 2013

Ս.թ. նոյեմբերի 19-ին Վիեննայի Hotel de France հյուրանոցի հանդիսությունների սրահում տեղի ունեցավ Արարատ կոնյակի համտեսի միջոցառում: Կազմակերպիչներն էին՝ Ավստրիայում Հայաստանի Հանրապետության դեսպանությունը և ԱՐԱՐԱՏ Երևանի կոնյակի գործարանը: Կազմակերպչական և մասնագիտական շրջանների ներկայության ապահովման հարցերում հայկական կողմին իր օժանդակությունը բերեց Ավստրիայի Գինեգործական եղբայրության և գինու ասպետների ընկերությունը:
Միջոցառմանը բացման խոսքով հանդես եկավ Ավստրիայում Հայաստանի Հանրապետության արտակարգ և լիազոր դեսպան Արման Կիրակոսյանը: Ներկաներին ողջունեց ԱՐԱՐԱՏ Երևանի կոնյակի գործարանի տնօրեն Արա Գրիգորյանը: Գործարանի աշխատակցուհին ներկայացրեց Հայաստանում կոնյակի արտադրության սկզբնավորման և զարգացման պատմությունը, ներկա արտադրատեսականին, ինչպես նաև արարողության մասնակիցներին ծանոթացրեց համտեսի մասնագիտական նրբություններին: Համտեսի ամբողջ ընթացքում հնչում էր կենդանի ջազային երաժշտություն լիբանանահայ հայտնի ջազ դաշնակահար Հովհաննես Ջիբյանի կատարմամբ:
Միջոցառմանը ներկա էին Ավստրիայի կառավարության, մասնավորապես՝ արտաքին գերատեսչության, առևտրատնտեսական շրջանների ներկայացուցիչներ, Վիեննայում հավատարմագրված դիվանագիտական առաքելությունների ղեկավարներ՝ դեսպանների մակարդակով, մասնագետ գինեգործներ, խմիչքի արտադրության և վաճառքի կազմակերպման հարցերում մասնագիտացած ընկերությունների ղեկավար անդամներ, լրագրողներ:
Միջոցառումն անցավ ջերմ մթնոլորտում: Ներկաներն իրենց դրական տպավորությունն արտահայտեցին միջոցառման կազմակերպման մակարդակի առնչությամբ, ինչպես նաև բարձր գնահատեցին հայկական կոնյակի համային և որակական այլ հատկանիշները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր