Հայաստանի Հանրապետության պատվիրակության մասնակցությունը ՄԱԿ-ի թմրանյութերի դեմ պայքարի հանձնաժողովի 57-րդ նստաշրջանի բարձրաստիճան նախարարական համաժողովին

13 մարտի, 2014

Ս.թ. մարտի 13-ից 14-ը Հայաստանի Հանրապետության պատվիրակությունը Վիեննայում մասնակցեց ՄԱԿ-ի թմրանյութերի դեմ պայքարի հանձնաժողովի 57-րդ նստաշրջանի բարձրաստիճան նախարարական համաժողովին:
Բարձրաստիճան համաժողովի հանդիսավոր բացմանը ելույթ ունեցան Շվեդիայի թագուհի Սիլվիան, ՄԱԿ-ի Գլխավոր Քարտուղարի տեղակալ Յան Էլիասոնը և ՄԱԿ-ի թմրանյութերի և հանցավորության դեմ պայքարի գրասենյակի գործադիր տնօրեն Յուրի Ֆեդոտովը:
ՀՀ պատվիրակությունը ղեկավարում էր ՀՀ ԱԳ նախարարի տեղակալ Աշոտ Հովակիմյանը: Պատվիրակության կազմում էին ՀՀ առողջապահության նախարարի տեղեկալ Վահան Պողոսյանը, Վիեննայում տեղակայված միջազգային կազմակերպություններում ՀՀ մշտական ներկայացուցիչ, Ավստրիայում ՀՀ դեսպան Արման Կիրակոսյանը, ՀՀ Գլխավոր դատախազության թմրամիջոցների ապօրինի շրջանառության հանցագործությունների գործերով բաժնի պետ Վարդան Մուրադյանը:
ՀՀ ԱԳ նախարարի տեղեկալ Ա. Հովակիմյանը իր ելույթում անդրադարձավ Թմրանյութերի դեմ պայքարի ՀՀ ազգային ռազմավարությանը` ընդգծելով անցած տարիների ընթացքում ՀՀ կառավարության կողմից իրականացված գործնական և օրենսդրական բարեփոխումները` թմրանյութերի անօրինական շրջանառության դեմ պայքարն առավել արդյունավետ դարձնելու համար: Պարոն Հովակիմյանը վերահաստատեց ՀՀ հանձնառությունը` միջազգային հանրության հետ համատեղ շարունակելու պայքարել Թմրանյութերի համաշխարհային խնդրի դեմ:
Նախարարական բարձրաստիճան հանդիպման ավարտին համաժողովի մասնակիցներն ընդունեցին համատեղ նախարարական հայտարարություն ` Թմրանյութերի դեմ համաշխարհային պայքարի միջազգային համապարփակ համագործակցության ռազմավարության վերաբերյալ 2009թ. ընդունված Քաղաքական հռչակագրի և գործողությունների ծրագրի իրականացման մասին:

Վերջ

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր