Ավստրիայի կողմից Ցեղասպանության ճանաչումը հայ համայնքի քրտնաջան աշխատանքի արդյունք է

24 սեպտեմբերի, 2015

Ավստրիայի կողմից Ցեղասպանության ճանաչումը հայ համայնքի քրտնաջան աշխատանքի արդյունք է. Արման Կիրակոսյան 24 Սեպտեմբեր, 2015 ԱՐՄԵՆՊՐԵՍ: Ավստրիայի կողմից Հայոց ցեղասպանության ճանաչումը և դատապարտումը եղել է Հայոց ցեղասպանության 100-րդ տարելիցի միջոցառումների համակարգման տեղական հանձնաժողովի, Ավստրիայի հայկական համայնքի կառույցների համատեղ ջանքերի արդյունքը: Այս մասին «Արմենպրես»-ի հետ զրույցում նշեց Ավստրիայում ՀՀ արտակարգ և լիազոր դեսպան Արման Կիրակոսյանը: «Իրականում Ավստրիայում նման հաջողության հասնելը հեշտ չէր, որովհետև այնտեղ թուրքական կես միլիոնանոց համայնք կա, իսկ հայկական համայնքն ընդամենը 5-6 հազար է, բայց դա էլ չխանգարեց, որպեսզի մենք հասնենք նրան, որ Ավստրիայի խորհրդարանը ճանաչի և դատապարտի Ցեղասպանությունը: Դա վերջին երկու տարիներին իմ գլխավորությամբ տեղական հանձնաժողովի և համայնքային կառույցների քրտնաջան աշխատանքի արդյունքն է»,- նշեց Կիրակոսյանը՝ կարևորելով այն հանգամանքը, որ Ցեղասպանությունը դատապարտող հայտարարության մեջ նշված է՝ Ավստրո-Հունգարիան այդ տարիներին եղել է Թուրքիայի դաշնակիցը և որոշակի պատասխանատվություն է կրում այդ իրադարձությունների համար:
Դեսպանը կարևորում է նաև այն հանգամանքը, որ Ավստրիան, լինելով ԵՄ անդամ երկիր, որը հավասարակշռված ու զգուշավոր քաղաքականություն է վարում, ճանաչել և դատապարտել է Հայոց ցեղասպանությունը: «Երբ Ավստրիայի խորհրդարանն ընդունեց ցեղասպանությունը դատապարտող հայտարարություն, Թուրքիան Ավստրիայից հետ կանչեց իր դեսպանին և մինչ օրս դեսպանը դեռ չի վերադարձել: Մեզ համար, իհարկե, եղել են դժվարություններ, սակայն մենք կարողացանք հաղթահարել դրանք և այնպես ենք հաղթահարել, որ Թուրքիան մինչև այս պահը դեսպանին հետ չի ուղարկել»,- եզրափակեց Արման Կիրակոսյանը:
Ավստրիայի խորհրդարանի բոլոր վեց խմբակցությունները 2015թ. ապրիլի 22-ին ընդունել են համատեղ հայտարարություն Հայոց ցեղասպանության ճանաչման ու դատապարտման վերաբերյալ: Այն պաշտոնապես հրապարակվել է ապրիլի 22-ին Ավստրիայի խորհրդարանի նիստում, որի մեկնարկին բոլոր ուժերը նախ լռության րոպեով հարգել են Հայոց ցեղասպանության զոհերի հիշատակը: Հայտարարությունը հստակ սահմանում է, որ 1915թ. հայերի հետ կատարվածը ցեղասպանություն էր, կոչ է հղում Թուրքիային` առերեսվելու պատմության հետ, ճանաչելու Հայոց ցեղասպանությունը: Ավստրիան ընդունում է իր պատասխանատվությունը` Առաջին աշխարհամարտի ժամանակ Օսմանյան կայսրության և Ավստրո-Հունգարիայի դաշնակցության առումով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր