Ավստրիայի, Դամասկոսի, Լոս Անջելեսի հայ համայնքները զորակցում են Արցախին

05 ապրիլի, 2016

ԵՐԵՎԱՆ, 5 ԱՊՐԻԼԻ,
ԱՐՄԵՆՊՐԵՍ:
Ավստրիայի,Դամասկոսի, Լոս Անջելեսի հայ համայնքներըը բողոքի ցույցեր են անցկացրել ընդդեմ Ադրբեջանի ռազմական ագրեսիայի և ի համերաշխություն Հայաստանի և Արցախի։

«Արմենպրես»-ի հաղորդմամբ՝ Հայաստանին և Լեռնային Ղարաբաղին իր
համերաշխությունն ու զորակցությունը ցուցաբերելու նպատակով ավստրիահայ համայնքը մի շարք քայլեր է
ձեռնարկել: Ավստրիայում գործող բոլոր համայնքային կազմակերպությունների անունից բաց նամակ է կազմվել և
փոխանցվել երկրի բոլոր քաղաքական մարմիններին՝ երկրի նախագահի ու վարչապետի գրասենյակներ, Ավստրիայի
Դաշնային Ժողով, Ավստրիա-Հայաստան բարեկամական խմբի անդամներին, արտաքին գերատեսչության ղեկավարին:
Նամակում ապրիլի 2-ից սկսած ԼՂ նկատմամբ Ադրբեջանի ռազմական ագրեսիան կանխելու և Ալիևի վարչակազմի
նկատմամբ ճնշում գործադրելու կոչ հնչեցնելուց բացի, դատապարտվել են Բաքվի արկածախնդիր քայլերը՝ ԼՂ
հիմնահարցը ռազմական ճանապարհով լուծելու ուղղությամբ: Նույն նամակը ներկայացվել է նաև ավստրիական և
երկրում հավատարմագրված միջազգային ԶԼՄ-ներին:
Համայնքային կազմակերպությունները նաև բողոքի ցույց են անցկացրել Վիեննայում տեղակայված ԵԱՀԿ գրասենյակի
առջև, ուր ապրիլի 5-ին անցկացվում էր ԵԱՀԿ Մշտական խորհրդի արտահերթ նիստը՝ նվիրված ԼՂ-ում վերջին օրերին
ռազմական գործողությունների վերսկսմանը: Բողոքի ակցիայի մասնակիցները ծածանել ե Հայաստանի և ԼՂՀ դրոշները
և պարզել պաստառներ, որոնց վրա գրված էին «Մենք ցանկանում ենք խաղաղություն և կայունություն», «Ադրբեջա՛ն.
ձեռքդ հեռու Արցախից», «Հարգեք մեր կյանքի եւ ինքնորոշման իրավունքը», «ԵԱՀԿ Մինսկի խումբ՝ դուք պետք է
դադարեցնեք Ալիևի ագրեսիան» կարգախոսները: Վիեննայի կենտրոնական Հելդենպլաց հրապարակի վրա
դիմավորելով ԵԱՀԿ գրասենյակ ժամանող արտերկրի ներկայացուցիչներին, ալիևյան արյունալի ռեժիմի դեմ բողոքող
մեր հայրենակիցները սուլոցներով և աղաղակներով են դիմավորել Ադրբեջանի և Թուրքիայի դիվանագետներին:
Այնուհետև ցույցի մասնակիցները ԵԱՀԿ նախագահությանն են հանձնել նամակ, որում կոչ է արվում աջակցել ԵԱՀԿ
Մինսկի խմբի համանախագահների ջանքերին՝ տարածաշրջանում երկարատև ու կայուն խաղաղությանը հասնելու
համար:
Ապրիլի 4-ին Դամասկոսի Հայոց թեմի առաջնորդ, Գերաշնոր Տ. Արմաշ Եպիս. Նալբանդյանի գլխավորությամբ
Սիրիայում ՀՀ դեսպանություն է այցելել դամասկոսահայերի պատվիրակությունը՝ Հայ Կաթողիկե եկեղեցու առաջնորդ
Արհ. Տ. Հովսեփ Առնաուտյանը, Հայոց թեմի ազգային իշխանությունների անդամներ, միությունների ատենապետեր և
վարչությունների անդամներ:
Դամասկոսահայ պատվիրակությանն ընդունել է Սիրիայում ՀՀ դեսպան Արշակ Փոլադյանը:
Գերաշնոր Տ. Արմաշ Եպիս. Նալբանդյանի նշել է, որ պատվիրակությունը եկել է դեսպանություն՝ դամասկոսահայերի
կողմից զորակություն հայտնելու Արցախի Հանրապետությանը հայ ժողովրդի համար այս ծանր օրերին:
Դեսպան Փոլադյանն իր կողմից շնորհակալություն է հայտնել համայնքի ղեկավարությանը՝ զորակցության համար և
ներկայացրել վերջին մի քանի օրերի ընթացքում տեղի ունեցած իրադարձությունները, ՀՀ բարձրագույն քաղաքական,
ռազմական և դիվանագիտական ղեկավարության կողմից իրականացված գործողությունները, ինչպես նաև
միջազգային հանրության արձագանքները:
Առանձնահատուկ ընդգծվել է անցած տարիներին Ադրբեջանի իշխանությունների ռազմատենչ հայտարարությունների
և ԼՂ հիմնախնդիրը փակուղի մտցնելու ու այն ռազմական ճանապարհով լուծելու բացահայտ նկրտումների մասին:
Հանդիպման ավարտին դեսպան Փոլադյանը կրկին բարձր է գնահատել ավելի քան հինգ տարի պատերազմական ծանր
պայմաններում գոյատևող սիրիահայության հայրենասիրական մղումներն ու զորակցությունը հայրենիքի հողը
պաշտպանողներին:
Հարավային Կալիֆորնիայի համայնքային կառույցները նախաձեռնել են ստեղծել Արցախի աջակցության մարմին, որը
կհամակարգի Արցախին ուղղվող օգնությունը՝ նյութական, ֆինանսական, տեխնիկական կամ այլ: Նորաստեղծ
կառույցում ընդգրկված են երեք ավանդական կուսակցությունների, կրոնական երիտասարդական, բարեգործական
կառույցների և հայրենակցական միությունների ներկայացուցիչները: Արցախի աջակցության մարմինն առաջիկա
օրերին կներկայացնի գործունեության մանրամասները:
Արցախցիներին ամեն կերպ օգնելու գաղափարի շուրջ համախմբվել են նաև ամերիկահայ երիտասարդները, որոնք
հատուկ ակցիա են կազմակերպել՝ ի աջակցություն Արցախի ժողովրդի:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր