ՀՀ մշտական ներկայացուցիչ, դեսպան Անդրանիկ Հովհաննիսյանի ելույթը ՄԱԿ հանցավորության կանխարգելման և քրեական արդարադատության հանձնաժողովի 34-րդ նստաշրջանին

19 մայիսի, 2025

Մայիսի 19-ին Վիեննայում միջազգային կազմակերպություններում ՀՀ մշտական ներկայացուցիչ, դեսպան Անդրանիկ Հովհաննիսյանը ելույթով հանդես է եկել ՄԱԿ հանցավորության կանխարգելման և քրեական արդարադատության հանձնաժողովի 34-րդ նստաշրջանին։

Իր ելույթում դեսպան Հովհաննիսյանն ընդգծել է, որ Հանձնաժողովի աշխատանքն ավելի մեծ ուշադրություն է գրավում աշխարհաքաղաքական և անվտանգային վատթարացող միջավայրում, որը խաթարում է արդարադատության արդյունավետ համակարգերի հիմքերը, մեծացնում հասարակությունների խոցելիությունը և նպաստում անդրազգային հանցագործությունների տարածմանը, այդ թվում՝ դրանց նոր և ի հայտ եկող դրսևորումներով։ Կազմակերպված հանցավորության և ահաբեկչության, միգրանտների անօրինական տեղափոխման և մարդկանց թրաֆիքինգի, կոռուպցիայի և փողերի լվացման փոխկապակցված դրսևորումները այն սպառնալիքների շարքում են, որոնց դեմ ոչ մի երկիր չի կարող պայքարել միայնակ։

Այս համատեքստում դեսպան Հովհաննիսյանը կարևորել է միջազգային համագործակցության ընդլայնումը և անդրադարձել հանցավորության հասցեագրման ուղղությամբ ՄԱԿ Թմրամիջոցների և հանցավորության դեմ պայքարի գրասենյակի (UNODC) հետ իրականացվող աշխատանքներին։

ՀՀ մշտական ներկայացուցիչը ընդգծել է արդարադատության հավասար հասանելիության կարևորությունը առավել անվտանգ և կենսունակ հասարակություն կառուցելու համար։

Արձանագրվել է, որ միջազգային հանրությունը աշխարհի տարբեր մասերում, այդ թվում՝ մեր անմիջական հարևանությամբ, ականատես է լինում դատական համակարգի չարաշահմանը՝ քաղաքական հետապնդումների և շինծու դատավարությունների դրսևորումներով, որոնք զուգորդվում են նվաստացնող վերաբերմունքի, պատշաճ իրավաբանական ներկայացուցչությունից, օգնությունից և խորհրդատվության հասանելիությունից զրկելու հետ, ինչը միջազգային իրավունքի կոպիտ խախտում է: Բոլոր մարդկանց իրավունքները հավասարապես պաշտպանող քրեական արդարադատության համակարգի ապահովումը պետությունների հիմնական պարտավորություններից է:

Ընդգծվել է նաև ատելության խոսքի դեմ պայքարի կարևորությունը, այդ թվում՝ կիբեռտարածքում, որպես ծանր հանցագործությունները, վայրագոււթյուններն ու բռնության այլ ձևերը խթանող գործոն: Ատելության խոսքի իրավական կարգավիճակի երկիմաստությունը չպետք է ծառայի որպես անբավարար իրավական արձագանքի արդարացում։

Որպես Կենսաբանական բազմազանության մասին կոնվենցիայի կողմերի 17-րդ համաժողովի հյուրընկալ երկիր՝ Հայաստանը կարևորել է շրջակա միջավայրի վրա ազդող հանցագործությունների հասցեագրումը՝ ուղղված կենսաբազմազանության կորստի կանխմանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր