Վիեննայի Դիվանագիտական ակադեմիայում տեղի ունեցավ «Ֆրանկոֆոնիայի ավան» միջոցառումը

12 մարտի, 2024

Մարտի 12-ին Վիեննայի Դիվանագիտական ակադեմիայում Ֆրանկոֆոնիայի գարնան շրջանակներում տեղի ունեցավ «Ֆրանկոֆոնիայի ավան» միջոցառումը, որը նվիրված էր կանաչ տուրիզմ թեմային:

Միջոցառումը կազմակերպվել էր Վիեննայի ֆրանսախոս դեսպանների խմբի (GAF) կողմից՝ Վիեննայում և Ժնևում Ֆրանկոֆոնիայի միջազգային կազմակերպության (ՖՄԿ) մշտական ներկայացուցչության աջակցությամբ:

Վիեննայի ֆրանսախոս դեսպանների խումբը, որը 2023թ. ապրիլից նախագահում է Ավստրիայում ՀՀ դեսպան Արմեն Պապիկյանը, ամեն տարի Ֆրանկոֆոնիայի միջազգային օրվա առթիվ կազմակերպում է տարբեր միջոցառումներ: Այս տարի, խմբում ՀՀ նախագահության նախաձեռնությամբ, այն առաջին անգամ անցկացվեց Ֆրանկոֆոնիայի ավանի ձևաչափով:

Միջոցառման բացման արարողությանը ելույթով հանդես եկավ դեսպան Արմեն Պապիկյանը, ով իր խոսքում կարևորեց ՖՄԿ անդամ պետությունների ջանքերը կանաչ տուրիզմի՝ որպես կանաչ տնտեսության տարրի զարգացման ուղղությամբ: Նա նշեց, որ Ֆրանկոֆոնիայի ավանը հոյակապ հնարավորություն է ևս մեկ անգամ ցուցադրելու և տոնելու այն ընդհանուր արժեքները որոնց շուրջ միավորված են ՖՄԿ անդամ երկրները՝ միաժամանակ շեշտելով մշակութային բազմազանությունը:

Ֆրանկոֆոնիայի ավանի շրջանակներում մասնակից պետություններն ազգային տաղավարներում ներկայացրին էկոտուրիզմի ոլորտում իրենց գրավչությունը և ուղղությունները:

Հայկական տաղավարում ցուցադրվել են Հայաստանում էկոտուրիզմի թեմային նվիրված տեղեկատվական նյութեր, գրքեր, հուշանվերներ, ցուցադրվել է Հայաստանի տեսարժան վայրերի մասին տեսահոլովակ: Հյուրերն համտեսել են հայկական քաղցրավենիք:

Միջոցառման խորագրի շուրջ կազմակերպվեցին նաև մի շարք միջոցառումներ՝ կանաչ զբոսաշրջությանը նվիրված ֆրանսերեն լեզվի արհեստանոց, կլոր սեղան, ինչպես նաև ֆիլմի ցուցադրություն:

Միջոցառմանը մասնակցեցին ավստրիացի և սլովակ պաշտոնյաներ, Վիեննայում հավատարմագրված դեսպաններ, դիվանագիտական կորպուսի ներկայացուցիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր