32-րդ ԵԱՀԿ Տնտեսական և բնապահպանական ֆորումը

11 սեպտեմբերի, 2026

Սեպտեմբերի 10-11-ը Պրահայում կայացել է 32-րդ ԵԱՀԿ Տնտեսական և բնապահպանական ֆորումը` «ԵԱՀԿ տարածքում անվտանգության և կայունության ամրապնդում՝ կանխատեսող տեխնոլոգիաների և գիտության վրա հիմնված դիվանագիտության միջոցով» խորագրի ներքո:

Ֆորումի շրջանակներում «Գիտության դերը դիվանագիտության մեջ» նիստին հիմնական ելույթով հանդես է եկել ՀՀ ԱԳՄԱ նախարարի տեղակալ Ռոբերտ Աբիսողոմոնյանը: ԱԳՄԱ նախարարի տեղակալը ներկայացրել է Կենսաբազմազանության մասին կոնվենցիայի կողմերի 17-րդ համաժողովի (COP17) շրջանակում Հայաստանի նախագահության հիմնական առաջնահերթություններն ու տեսլականը՝ անդրադառնալով գիտության և դիվանագիտության փոխլրացնող դերին գլոբալ բնապահպանական մարտահրավերների հասցեագրման գործում։

Ֆորումին ազգային ելույթով հանդես է եկել ԵԱՀԿ-ում ՀՀ մշտական ներկայացուցիչ Անդրանիկ Հովհաննիսյանը: Իր ելույթում ՀՀ դեսպանն անդրադարձել է ԵԱՀԿ տարածաշրջանում նոր և զարգացող տեխնոլոգիաների ազդեցությանը, դրանց ընձեռած հնարավորություններին և հնարավոր անվտանգային մարտահրավերներին։ Նա ներկայացրել է նաև բարձր տեխնոլոգիաների և նորարարության ոլորտում Հայաստանի փորձը՝ անդրադառնալով «TUMO» ստեղծարար տեխնոլոգիաների կենտրոնի գործունեությանը և վերջերս գործարկված «Firebird AI Factory»-ին։

Դեսպան Հովհաննիսյանը անդրադարձ է կատարել «Թրամփի ուղի՝ հանուն միջազգային խաղաղության և բարգավաճման» (TRIPP) նախաձեռնությանը՝ որպես տարածաշրջանային փոխկապակցվածության ընդլայնման, տնտեսական նոր հնարավորությունների ստեղծման և Հարավային Կովկասում երկարաժամկետ խաղաղության, կայունության ու բարգավաճման խթանման կարևոր գործոնի։

Ի գիտություն. Տնտեսական և բնապահպանական ֆորումը այս ոլորտում ԵԱՀԿ տարեկան գլխավոր միջոցառումն է։ Այն անդրադառնում է ԵԱՀԿ պարտավոությունների կատարմանը, առկա և նոր մարտահրավերներին և դրանց հասցեագրման ու հաղթահարման ուղիներին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր