Ավստրիայում Հայաստանի դեսպանության մասնակցությունը Մաութհաուզենի ազատագրման և Մեծ հայրենական պատերազմում հաղթանակի 73-ամյակի տոնահանդիսություններին

06 մայիսի, 2018

Ս.թ. մայիսի 6-ին Ավստրիայում ՀՀ դեսպանության և Վիեննայի միջազգային կազմակերպություններում ՀՀ ներկայացուցչության անձնակազմը՝ ՀՀ դեսպան Արման Կիրակոսյանի գլխավորությամբ, մասնակցեց Ավստրիայի Լինց քաղաքի մերձակայքում գտնվող Մաուտհաուզենի համակենտրոնացման ճամբարի ազատագրման 73-ամյակին նվիրված միջոցառումներին: ԱՊՀ և մի շարք այլ երկրների պատվիրակությունների հետ միասին ՀՀ դեսպանությունը ծաղկեպսակներ զետեղեց խորհրդային ռազմագերիների հիշատակը հավերժացնող Հայաստանի, Ռուսաստանի, Բելառուսի, Ղազախստանի, Ուկրաինայի կողմից հուշահամալիրի տարածքում տեղադրված հուշատախտակների, ինչպես նաև համակենտրոնացման ճամբարում ազատազրկված եվրոպական ազգերի ռազմագերիների համալիրի կենտրոնական հուշակոթողի մոտ: Այնուհետև հայկական պատվիրակությունը մասնակցեց հանդիսավոր պաշտոնական արարողությանը, որին ներկա էին Ավստրիայի նախագահ Ալեքսանդր Վան դեր Բելլենը, վարչապետ Սեբաստիան Կուրցը, Դաշնային խորհրդարանի երկու պալատների նախագահները, նախարարներ, պատգամավորներ, Ավստրիայում հավատարմագրված դիվանագիտական ներկայացուցչությունների, միջազգային ու տեղական կազմակերպությունների պատվիրակություններ։

Մայիսի 9-ին Ավստրիայում ՀՀ դեսպանության և Վիեննայի միջազգային կազմակերպություններում ՀՀ ներկայացուցչության անձնակազմը՝ ՀՀ դեսպան Արման Կիրակոսյանի գլխավորությամբ, մասնակցեց Երկրորդ աշխարհամարտում ԽՍՀՄ ժողովուրդների տարած հաղթանակի 73-րդ տարեդարձին նվիրված Վիեննայում անցկացված հանդիսավոր միջոցառումներին: Հայ դիվանագետները մասնակցեցին Վիեննայի կենտրոնական գերեզմանատանը Հայրենական մեծ պատերազմի զոհերի հիշատակը հավերժացնող հուշարձանի, ինչպես նաև քաղաքի կենտրոնում գտնվող խորհրդային զորքերի հաղթանակը խորհրդանշող հուշակոթողի մոտ տեղի ունեցած պաշտոնական արարողություններին, որոնց ներկա էին Ավստրիայի կառավարության անդամներ, պատգամավորներ, Ավստրիայում հավատարմագրված նախկին ԽՍՀՄ և բարեկամ այլ պետությունների դիվանագիտական ներկայացուցչությունների ղեկավարներ, դիվանագետներ, վետերաններ, հայ և այլ համայնքների բազմաթիվ ներկայացուցիչներ։

Այնուհետև Վիեննայում Ռուսաստանի Դաշնության դեսպանությունում ԱՊՀ մի շարք երկրների, այդ թվում Հայաստանի անունից տեղի ունեցավ ընդունելություն՝ ազգային ճաշատեսակների ու ըմպելիքների մատուցմամբ: Նույն օրը երեկոյան դեսպանությունը մասնակցեց Վիեննայի կենտրոնական հրապարակում կազմակերպած «Անմահ գունդ» քայլերթին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր