ԱԷՄԳ Կառավարիչների խորհրդի նիստ

11 սեպտեմբերի, 2019

Սեպտեմբերի 9-11-ը Վիեննայում կայացավ Ատոմային էներգիայի միջազգային գործակալության (ԱԷՄԳ) Կառավարիչների խորհրդի նիստը, որի օրակարգում ընդգրկված էին տեխնիկական համագործակցությանը, Իրանի Իսլամական Հանրապետությունում մշտադիտարկմանը և ստուգմանն առնչվող հարցեր, ինչպես նաև միջուկային և ռադիացիոն անվտանգությանը, միջուկային գիտությանը, տեխնոլոգիաների և կիրառմանը, երաշխիքների համաձայնագրերի կատարմանը վերաբերող հարցեր։

Նիստին մասնակցում էր ՀՀ պատվիրակությունը՝ ԿԽ-ում Հայաստանի մշտական ներկայացուցիչ, ԿԽ փոխնախագահ, դեսպան Արմեն Պապիկյանի գլխավորությամբ: Արմեն Պապիկյանը որպես ԿԽ փոխնախագահ վարեց նաև սեպտեմբերի 10-ի ԱԷՄԳ Կառավարիչների խորհրդի նիստը։

Օրակարգի «Միջուկային և ռադիացիոն անվտանգություն» կետի ներքո ելույթ ունեցավ ՀՀ մշտական ներկայացուցիչ Արմեն Պապիկյանը, ով ներկայացնելով ՀԱԷԿ-ի միջուկային անվտանգությունը բարձրացնելու նպատակով ձեռնարկվող միջոցառումներն՝ անդրադարձավ նաև վերջերս Հայաստան այցելած ԱԷՄԳ փորձագետների թիմի եզրակացությանը, որտեղ նշվում է միջուկային և ռադիացիոն անվտանգության բնագավառում Հայաստանի կողմից գրանցված առաջընթացը։

Հայաստանի պատվիրակությունը ելույթ ունեցավ նաև Իրանին վերաբերող օրակարգի կետի ներքո, աջակցություն հայտնելով Իրանում մշտադիտարկման աշխատանքներ իրականացնող ԱԷՄԳ թիմին, աջակցություն հայտնելով Համատեղ համապարփակ գործողությունների ծրագիրը (JCPOA) պահպանելուն ուղղված միջազգային գործընկերների ջանքերին, կոչ անելով շարունակել ԱԷՄԳ և Իրանի համագործակցությունը՝ ուղղված ՄԱԿ-ի ԱԽ 2231(2015) բանաձևի լիակատար իրագործմանը:

Տեղեկանք․ ԱԷՄԳ-ն 171 անդամ երկրներից բաղկացած միջազգային կազմակերպություն է, որի որոշում կայացնող մարմիններից է 35 անդամներից բաղկացած ԱԷՄԳ Կառավարիչների խորհուրդը և որին փոխնախագահի պաշտոնով անդամակցում է Հայաստանը։ Միջուկային էներգիայի խաղաղ օգտագործման արդիական հարցերից զատ, Կառավարիչների խորհուրդն ուսումնասիրում և առաջարկություններ է ներկայացնում ԱԷՄԳ Գլխավոր համաժողովին ֆինանսական հաշվետվությունների, ծրագրի և բյուջեի վերաբերյալ: Այն քննարկում է կազմակերպության անդամակցության հայտերը, հաստատում երաշխիքների պայմանագրերը և ԱԷՄԳ անվտանգության չափորոշիչները: Այն նշանակում է նաև ԱԷՄԳ--ի Գլխավոր տնօրենին, որին այնուհետ հաստատում է ԱԷՄԳ Գլխավոր համաժողովը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր