«Հայկական հեքիաթներ - Հովհաննես Թումանյան» գերմաներեն գրքի շնորհանդես Ավստրիայում ՀՀ դեսպանությունում - Ավստրիայում և Սլովակիայում ՀՀ դեսպանություն, ԵԱՀԿ-ում, ՄԱԿ-ում ՀՀ մշտական ներկայացուցչություն

«Հայկական հեքիաթներ - Հովհաննես Թումանյան» գերմաներեն գրքի շնորհանդես Ավստրիայում ՀՀ դեսպանությունում

10 հոկտեմբերի, 2019

Հոկտեմբերի 9-ին Ավստրիայում ՀՀ դեսպանության «Արմենիա» սրահում՝ Թումանյանի ծննդյան 150-ամյա հոբելյանի շրջանակներում տեղի ունեցավ «Հայկական հեքիաթներ - Հովհաննես Թումանյան» գերմաներեն գրքի շնորհանդեսը։

Հովհաննես Թումանյանի հեքիաթների ժողովածուն՝ շուրջ 20 հեքիաթներ, հայերենից գերմաներեն թարգմանել են Հայաստանի գրողների միության անդամ Ագապի Մկրտչյանը և պրոֆեսոր Հելմուտ Մալոնեկը (Helmuth Malonek): Ժողովածուն տպագրվել է Ավստրիայում:

Միջոցառմանը ողջույնի խոսքով հանդես եկավ Ավստրիայում Հայաստանի դեսպան Արմեն Պապիկյանը, ով անդրադարձավ Ամենայն հայոց բանաստեղծի գրական ժառանգությանը, նշելով նաև, որ առանց Թումանյանի թերևս անհնար է պատկերացնել հայ գրականությունն ու հայ ժողովրդի ոգին: Շնորհակալություն հայտնելով գրքի հեղինակներին՝ դեսպանն ընդգծեց, որ թարգմանված ժողովածուն բացառիկ հնարավորություն է ընձեռում գերմանախոս ընթերցողին, այդ թվում նաև երեխաներին, ծանոթանալու Հովհաննես Թումանյանի հեքիաթներին:

Ագապի Մկրտչանը և Հելմութ Մալոնեկն անդրադարձան Հովհաննես Թումանյանի հեքիաթների թարգմանության գաղափարին, ինչպես նաև թարգմանության առանձնահատկություններին, կարդացին գերմաներեն թարգմանված հեքիաթներ:

Շնորհանդեսի շրջանակներում ներկայացվեց «Հովհաննես Թումանյանի հեքիաթները հայ և գերմանացի դպրոցականների աչքերով» խորագրով ցուցահանդեսը։

Միջոցառումն ուղեկցվում էր նաև երաժշտական ընդմիջումներով, ներկայացվեցին Կոմիտասի և Խաչատուր Ավետիսյանի ստեղծագործությունները՝ երաժիշտներ Սյուզաննա Բարսեղյանի (ֆլեյտա) և Ելենա Մաշալովայի (դաշնամուր) կատարմամբ:

Միջոցառմանը մասնակցեցին դիվանագետներ, Վիեննայում Մխիթարյան միաբանության վանահայր հայր Նարեկը, հայ համայնքային կառույցների ղեկավարներ, համայնքի ներկայացուցիչներ, արվեստագետներ և այլն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր