Ավստրիայի Հանրապետության Եվրոպայի, ինտեգրման և արտաքին գործերի դաշնային նախարար Ալեքսանդր Շալլենբերգն այցելեց Վիեննայի Սուրբ Հռիփսիմե հայ առաքելական եկեղեցի

24 հոկտեմբերի, 2019

Հոկտեմբերի 24-ին Ավստրիայի Հանրապետության Եվրոպայի, ինտեգրման և արտաքին գործերի դաշնային նախարար Ալեքսանդր Շալլենբերգը, ով նաև ԵՄ, արվեստի, մշակույթի և մամուլի հարցերով դաշնային նախարարն է, այցելեց Վիեննայի Սուրբ Հռիփսիմե հայ առաքելական եկեղեցի:

Նախարարին ողջունեցին Ավստրիայում ՀՀ դեսպան Արմեն Պապիկյանը, Կենտրոնական Եվրոպայի և Շվեդիայի հայրապետական պատվիրակ Գերաշնորհ Տ. Տիրան եպիսկոպոս Պետրոսյանը, Ավստրիայի հայ առաքելական եկեղեցական համայնքի ատենապետ Վահագն Ամիրջանյանը, հոգևոր հովիվ Տեր Անդրեաս Քահանա Իսախանյանը, եկեղեցական վարչության անդամներ:

Այցի շրջանակներում տեղի ունեցած հանդիպման ընթացքում դեսպան Արմեն Պապիկյանը, շնորհակալություն հայտնելով հայ համայնքի նկատմամբ ցուցաբերած ուշադրության համար, բարձր գնահատեց նախարարի այցելությունը։ Երկուստեք ընդգծվեց ավստրահայ համայնքի դերը և գործունեությունը, որը կոչված է ինչպես ազգային արժեքները պահպանելու, այնպես և կամուրջի դեր խաղալու երկու բարեկամ երկրների միջև փոխճանաչողության խթանման գործում:

Անդրադարձ կատարվեց հայ-ավստրիական բարեկամական հարաբերություններին և այս համատեքստում կարևորվեց ԱԳ նախարարների մակարդակով երկխոսությունը։

ԱԳ նախարարն այցելեց նաև Սուրբ Հռիփսիմե հայ առաքելական եկեղեցուն կից գործող շաբաթօրյա դպրոց և մանկապարտեզ: Գերաշնորհ Տ. Տիրան եպիսկոպոս Պետրոսյանը և Ավստրիայի հայ առաքելական եկեղեցական համայնքի ատենապետ Վահագն Ամիրջանյանը նախարարին ծանոթացրին կրթական օջախների գործունեության պայմաններին, ներկայացրեցին Ավստրիայում հայ համայնքի ազգային և հոգևոր-մշակութային կյանքը:

Ալեքսանդր Շալլենբերգին ուղեկցում էին նախարարի խորհրդական, Կրոնական-եկեղեցական համայնքների, միջհամայնքային մշակութային հարցերի վարչության ղեկավար Ֆլորիան Վելցիգը, մշակութային հարցերով խորհրդական Լիլի-Մարի Կունցը, Հայաստանում Ավստրիայի դեսպան Ալոիս Կրաուտը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր