Կոմիտասի ծննդյան 150-ամյակին նվիրված համերգ Վիեննայում

17 դեկտեմբերի, 2019

Դեկտեմբերի 17-ին Վիեննայի Մխիթարյան միաբանության վանքում Ավստրիայում Հայաստանի դեսպանության կողմից կազմակերպվեց «Armenian Christmas Concert in Vienna» խորագրով համերգ, որը նվիրված էր Կոմիտաս Վարդապետի ծննդյան 150-ամյակին։

Համերգի ծրագրում ներառված էին Կոմիտասի շուրջ 20 ստեղծագործություններ, որոնք ներկայացրեցին հայ մեծանուն սոպրանո Հասմիկ Պապյանը և դաշնակահարուհի Նարե Արղամանյանը։ Համերգի ժամանակ հնշեցին նաև հատվածներ Արամ Խաչատրյանի ստեղծագործություններից։

Համերգի բացման իր խոսքում Ավստրիայում Հայաստանի դեսպան Արմեն Պապիկյանը նշեց, որ Կոմիտասը հայկական մշակույթի առանցքային ներկայացուցիչ է, որի աշխատանքի շնորհիվ է նաև հնարավոր եղել պահպանել հայկական ժողովրդական և հոգևոր երաժշտության հազարավոր նմուշներ։

Դեսպան Պապիկյանը նաև նշեց, որ հաշվի առնելով Կոմիտասի կարևորագույն ներդրումը համաշխարհային երաժշտական մշակույթի զարգացման և երաժշտական ժառանգության պահպանման գործում, Կոմիտաս Վարդապետի ծննդյան 150-ամյա հոբելյանը ընդգրկվել է ՅՈՒՆԵՍԿՕ-ի՝ Հռչակավոր մարդկանց և կարևոր իրադարձությունների հոբելյանների 2018-2019 թթ. օրացույցում։

Համերգին ներկա էին ԵԱՀԿ Գլխավոր քարտուղարը, Կենտրոնական Եվրոպայի և Շվեդիայի Հայրապետական պատվիրակ Տիրան եպիսկոպոս Պետրոսյանը, ՀԱԵ և Մխիթարյան միաբանության հագևոր հայրեր, Ավստրիայում, ՄԱԿ-ում և ԵԱՀԿ-ում հավատարմագրված դեսպաններ, Ավստրիայի ԱԳՆ բարձրաստիճան ներկայացուցիչներ, միջազգային կազմակերպությունների և լրատվամիջոցների ներկայացուցիչներ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր