Ավստրիայում ՀՀ դեսպան Արմեն Պապիկյանի այցը Զալցբուրգի դաշնային երկրամաս

23 հունվարի, 2020

Ս.թ. հունվարի 20-ից 21-ը կայացավ Ավստրիայում ՀՀ դեսպան Արմեն Պապիկյանի այցը Զալցբուրգի դաշնային երկրամաս: Դեսպան Պապիկյանը հանդիպումներ ունեցավ երկրամասի կենտրոնի՝ Զալցբուրգի քաղաքապետ Հարալդ Պրոյների (Harald Preuner), Զալբուրգի դաշնային խորհրդարանի նախագահ Բրիգիտտա Պալլաուֆի (Brigitta Pallauf) հետ:

Զալցբուրգի քաղաքապետի հետ, այլ հարցերի շարքում, քննարկվեցին զբոսաշրջության, մշակույթի, մարզային քաղաքների զարգացման, Հայաստանի քաղաքների հետ համագործակցության հաստատման հեռանկարները: Դեսպան Պապիկյանը նշեց, որ հայկական կողմի համար հատկապես հետաքրքրություն են ներկայացնում զբոսաշրջային հոսքերի կառավարման, զբոսաշրջիկների ներգրավման, զբոսաշրջիկների աճին համապատասխան քաղաքային և շրջանային տնտեսության հարմարեցման և այլ հարցեր։ Զալցբուրգի իշխանությունները պատրաստակամություն հայտնեցին իրենց լավագույն փորձը փոխանցել հայ գործընկերներին:

Զալցբուրգի դաշնային երկրամասի խորհրդարանի նախագահի հետ հանդիպմանը ՀՀ դեսպանը համառոտ անդրադարձավ Հայաստանի արտաքին քաղաքականության առաջնահերթություններին, Հայաստանում տեղի ունեցած ժողովրդավարական գործընթացներին, տնտեսության զարգացման և կոռուպցիայի դեմ պայքարի բնագավառում գրանցած առաջընթացին և այլն: Քննարկվեցին նաև Հայաստանի և Ավստրիայի տեղական և տարածաշրջանային իշխանությունների մակարդակում ընտրովի մարմինների միջև համագործակցության զարգացման հեռանկարները։ Երկուստեք կարևորվեց երկու երկրների միջև ապակենտրոնացված համագործակցության խթանումը։

Այցի շրջանակներում ՀՀ դեսպանը այցելեց Զալցբուրգի համալսարան և հանդիպում ունեցավ դասախոսական անձնակազմի հետ, ինչպես նաև դասախոսություն կարդաց «Հայաստանի արտաքին քաղաքականության առաջնահերթությունները» թեմայով, որին ներկա էին համալսարանի ուսանողները, ինչպես նաև պրոֆեսորադասախոսական կազմը: Դասախոսության ավարտին դեսպան Պապիկյանը պատասխանեց ուսանողների հարցերին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր