Սլովակիայում ՀՀ դեսպան Արմեն Պապիկյանի հանդիպումը Սլովակիայի Հանրապետության Ազգային խորհրդի նախագահ Անդրեյ Դանկոյի հետ

24 հունվարի, 2020

Հունվարի 23-ին տեղի ունեցավ Ավստրիայում ՀՀ դեսպան Արմեն Պապիկյանի հանդիպումը Սլովակիայի Ազգային խորհրդի նախագահ Անդրեյ Դանկոյի (Andrej Danko) հետ: Հանդիպման սկզբում Անդրեյ Դանկոն հաջողություններ մաղթեց դեսպան Պապիկյանին Սլովակիայում առաքելության իրականացման գործում՝ վստահություն հայտնելով, որ դեսպանի գործունեությունը կնպաստի ինչպես երկու երկրների միջև հարաբերություններում, այնպես և միջազգային կազմակերպությունների շրջանակներում նոր առաջընթացի ձեռքբերմանը:

Սլովակիայի Ազգային խորհրդի նախագահը նշեց, որ երկու երկրների միջև գոյություն ունեն բարեկամական հարաբերություններ, առկա են նաև լավ հիմքեր Հայաստանի և Սլովակիայի խորհրդարանների միջև կառուցողական համագործակցության խորացման համար:

Դեսպան Պապիկյանն անդրադարձավ Հայաստանի և Սլովակիայի միջև երկկողմ հարաբերություններին, նշեց, որ Սլովակիան Հայաստանի կարևոր գործընկերներից մեկն է, և Հայաստանը շահագրգռված է ընդլայնելու Սլովակիայի հետ քաղաքական, առևտրատնտեսական և փոխադարձ հետաքրքրություն ներկայացնող այլ ոլորտներում համագործակցությունը:

ՀՀ դեսպանը միաժամանակ տեղեկացրեց, որ Հայաստանը մեծապես կարևորում է միջխորհրդարանական համագործակցությունը երկու երկրների միջև և այն համարում է միջպետական հարաբերությունների կարևոր բաղադրիչ: Դեսպան Պապիկյանը նաև գոհունակություն հայտնեց երկու երկրների խորհրդարանների միջև միջազգային հարթակներում ծավալվող համագործակցության կապակցությամբ:

Օգտվելով առիթից՝ դեսպան Պապիկյանը շնորհակալություն հայտնեց սլովակյան կողմին Հայոց ցեղասպանության ճանաչման և դատապարտման համար, ինչպես նաև Անդրեյ Դանկոյին՝ նշյալ հարցում իր սկզբունքային դիրքորոշման համար:

Զրուցակիցները մտքեր փոխանակեցին նաև երկկողմ հետաքրքրություն ներկայացնող հարցերի շուրջ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր