Ավստրիայում ՀՀ դեսպան Արմեն Պապիկյանի այցը Ֆորարլբերգի դաշնային երկրամաս

31 հունվարի, 2020

Հունվարի 29-ից 30-ը կայացավ Ավստրիայում ՀՀ դեսպան Արմեն Պապիկյանի այցը Ֆորարլբերգի դաշնային երկրամաս: Դեսպան Պապիկյանը հանդիպումներ ունեցավ երկրամասի ղեկավար Մարկուս Վալլների /Markus Wallner/, երկրամասի դաշնային խորհրդարանի նախագահ Հարալդ Զոնդերեգգերի /Harald Sonderegger/ հետ:

Ֆորարլբերգի ղեկավար Մարկուս Վալլների հետ քննարկվեցին Հայաստանի և Ֆորարլբերգի միջև ձևավորված բարեկամական հարաբերություններին առնչվող հարցեր: Անդրադարձ կատարվեց նաև Հայաստանից խորհրդարանական պատվիրակությունների, Հայաստանի Գեղարքունիքի մարզի և Ֆորարլբերգի երկրամասի միջև բարեկամության և համագործակցության շրջանակներում Գեղարքունիքի մազպետարանի պատվիրակությունների Ֆորարլբերգի երկրամաս կատարած այցերին:

ՀՀ դեսպանն ընդգծեց, որ Ավստրիան Հայաստանին մարդասիրական օգնություն հատկացնող կարևոր երկրներից է՝ դեռևս 1988թ. երկրաշարժից հետո` Գյումրիում «Ավստրիական թաղամասի», Ավստրիական մանկական հիվանդանոցի կառուցմամբ և մարդասիրական այլ ծրագրերով: Օգտվելով առիթից՝ ՀՀ դեսպանը շնորհակալություն հայտնեց երկրամասի կառավարությանը, մասնավորապես «Կարիտաս Ֆորարլբերգին»՝ Հայաստանում սոցիալական և տնտեսական զարգացման տարբեր բնագավառներում աջակցություն ցուցաբերելու համար:

Հաշվի առնելով Հայաստանում զբոսաշրջային բիզնեսի կազմակերպման և կառավարման կարևորությունը, ՀՀ դեսպանը կարևորեց ավստրիական լավագույն փորձի ձեռք բերումը նշյալ ոլորտում:

Երկրամասի դաշնային խորհրդարանի նախագահ Հարալդ Զոնդերեգգերի հետ քննարկվեցին Հայաստանի մարզերի և Ֆորարլբերգի երկրամասի միջև համագործակցության խորացման, քաղաքական, առևտրատնտեսական, մշակութային, կրթական բնագավառներում համագործակցության ակտիվացման հնարավորությունները: Դեսպան Պապիկյանը զրուցակցին ներկայացրեց Հայաստանում տեղի ունեցող ժողովրդավարական բարեփոխումների օրակարգը: Կարևորվեց Ֆորարլբերգի երկրամասի պատվիրակությունների կողմից Հայաստան այցելությունների կազմակեպումը՝ Հայաստանի մասին առավել լավ պատկերացում կազմելու նպատակով:

Այցի շրջանակներում դեպան Պապիկյանն այցելեց Ֆելդկիրխ քաղաքում գտնվող «Կարիտաս Ֆորարլբերգ» կենտրոն, որտեղ հանդիպումներ ունեցավ կենտրոնի տնօրեն Վալտեր Շմոլլիի /Walter Schmolly/ և Հայաստանի հետ իրականացվող ծրագրերի ղեկավար Ռոբերտ Մոոսբրուգգերի /Robert Moosbrugger/ հետ: Հանդիպման ընթացքում անդրադարձ կատարվեց «Կարիտաս Ավստրիա» և «Կարիտաս Հայաստան» բարեսիրական հասարակական կազմակերպությունների միջև 2006թ.-ից սկիզբ առած արդյունավետ համագործակցությանը:

Դեսպան Պապիկյանն այցի շրջանակներում նաև եղավ Ավստրիայի Տիրոլ երկրամասի կենտրոն Իննսբրուք քաղաքում, որտեղ ծաղկեպսակ զետեղեց քաղաքի կենտրոնական Մարիահիլֆ պուրակում տեղադրված Հայոց ցեղասպանության նահատակների հիշատակը հավերժացնող խաչքարի մոտ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր