Դեսպան Արմեն Պապիկյանի հանդիպումը Ավստրիայի ԱԳՆ Գլխավոր քարտուղար Պետեր Լաունսկի-Թիֆենթալի հետ

07 հուլիսի, 2020

Հուլիսի 7-ին Ավստրիայում ՀՀ դեսպան Արմեն Պապիկյանը հանդիպեց Ավստրիայի Եվրոպական և միջազգային հարցերի դաշնային նախարարության Գլխավոր քարտուղար, դեսպան Պետեր Լաունսկի-Թիֆենթալի (Peter Launsky-Tieffenthal) հետ:

Շնորհակալություն հայտնելով ընդունելության համար՝ ՀՀ դեսպանը գոհունակությամբ նշեց, որ վերջին տարիներին հայ-ավստրիական հարաբերություններում արձանագրվել է զարգացման դրական դինամիկա, կայացել են փոխադարձ բարձրաստիճան այցեր: Դեսպան Պապիկյանը հույս հայտնեց, որ այդ միտումը հետագայում ևս կշարունակվի՝ ընդգրկելով երկկողմ և բազմակողմ համագործակցության նոր ոլորտներ:

Զրուցակիցները կարևորեցին երկու երկրների արտաքին գերատեսչությունների միջև պարբերական խորհրդատվությունների անցկացումը, ինչպես նաև հայ-ավստրիական առևտրատնտեսական և գիտատեխնիկական համագործակցության խառը հանձնաժողովի գործունեությունը:

ՀՀ դեսպանն անդրադարձավ Հայաստան-Եվրոպական միություն հարաբերություններին, Եվրամիության և ԵՄ անդամ պետությունների հետ հարաբերությունների նոր իրավական հենք հանդիսացող Համապարփակ և ընդլայնված գործընկերության համաձայնագրին, դրա հիման վրա երկու երկրների միջև փոխադարձ հետաքրքրություն ներկայացնող ոլորտներում փոխգործակցության հեռանկարներին: Դեսպան Պապիկյանը, օգտվելով առիթից, շնորհակալություն հայտնեց ավստրիական կողմին Համաձայնագրի վավերացման ընթացակարգերն ավարտին հասցնելու համար:

ՀՀ դեսպանը նաև անդրադարձավ Երևանում Ավստրիական զարգացման գործակալության գրասենյակի աշխատանքներին՝ ընդհանուր առմամբ իր գոհունակությունը հայտնելով կատարված աշխատանքների առնչությամբ:

Հանդիպման ընթացքում դեսպան Պապիկյանը ներկայացրեց ԼՂ հիմնախնդրի խաղաղ կարգավորման ներկայիս ընթացքը, ինչպես նաև տարածաշրջանին առնչվող մարտահրավերները:

Ավստրիայի ԱԳՆ Գլխավոր քարտուղար Պետեր Լաունսկի-Թիֆենթալը շնորհակալություն հայտնեց հանդիպման համար, նշեց, որ բարձր է գնահատում հայ-ավստրիական հարաբերությունները՝ միաժամանակ ընդգծելով, որ երկկողմ քաղաքական փոխգործակցությունը մեծ ներուժ ունի: Գլխավոր քարտուղարը նաև գոհունակությամբ նշեց միջազգային կազմակերպություններում երկու երկրների միջև առկա արդյունավետ փոխգործակցությունը՝ վստահեցնելով, որ ավստրիական կողմը պատրաստ է էլ ավելի խորացնել համագործակցությունը՝ նախանշելով թիրախային նոր ոլորտներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր