Դեսպան Արմեն Պապիկյանի հանդիպումները Սլովակիայի ԱԳՆ-ում և Ազգային խորհրդում

09 հուլիսի, 2020

Հուլիսի 8-ին կայացավ ՀՀ դեսպան Արմեն Պապիկյանի աշխատանքային այցը Սլովակիա: Այցի ընթացքում Դեսպան Պապիկյանը հանդիպումներ ունեցավ Սլովակիայի Հանրապետության Արտաքին և եվրոպական գործերի նախարարության քաղաքական տնօրեն Ռոման Բուժեկի (Roman Bužek), Արևելյան Եվրոպայի, Հարավային Կովկասի և Կենտրոնական Ասիայի վարչության տնօրեն Միխալ Սլիվովիչի (Michal Slivovič) հետ:

Սլովակիայի ԱԳՆ-ում կայացած հանդիպումների ընթացքում դեսպան Պապիկյանն անդրադարձավ Հայաստանի և Սլովակիայի միջև երկկողմ օրակարգի ընդլայնմանը, փոխադարձ հետաքրքրություն ներկայացնող ոլորտներում հայ-սլովակյան հարաբերությունների զարգացմանը: ՀՀ դեսպանը կարևորեց երկու երկրների միջև բարձրաստիճան փոխայցելությունների և հանդիպումների կազմակերպման, ԱԳՆ-երի միջև համագործակցության խորացման անհրաժեշտությունը, ինչպես նաև ընդգծեց երկու երկրների միջև տնտեսական կապերի ընդլայնման և խորացման կարևորությունը:

Հանդիպման ընթացքում անդրադարձ կատարվեց ԵԱՀԿ և միջազգային այլ կազմակերպությունների շրջանակներում փոխգործակցությանն առնչվող մի շարք հարցերին:

Դեսպան Պապիկյանը անդրադարձավ Հայաստան-Եվրոպական միություն հարաբերություններին, Համապարփակ և ընդլայնված գործընկերության համաձայնագրի հիման վրա Հայաստանի և Սլովակիայի միջև փոխադարձ հետաքրքրություն ներկայացնող ոլորտներում համագործակցության հեռանկարներին:

Հանդիպման ընթացքում ՀՀ դեսպանը ներկայացրեց ղարաբաղյան հիմնախնդրի խաղաղ կարգավորման ուղղությամբ բանակցային գործընթացի վերջին զարգացումները, ինչպես նաև տարածաշրջանային առկա մարտահրավերերը:

Դեսպանը հանդիպումներ ունեցավ նաև Սլովակիայի Ազգային խորհրդում՝ Մարդու իրավունքների և փոքրամասնությունների հարցերի հանձնաժողովի փոխնախագահ Վլադիմիրա Մարցինկովայի (Vladimíra Marcinková), Պաշտպանության և անվտանգության հարցերի հանձնաժողովի նախագահ Յուրայ Կրուպայի (Juraj Krúpa), Տնտեսական հարցերի հանձնաժողովի նախագահ Պետեր Կրեմսկիի (Peter Kremský) հետ:

Ազգային խորհրդի պատգամավորների հետ հանդիպմանը քննարկվեցին երկկողմ հարաբերություններին, միջխորհրդարանական համագործակցության օրակարգին առնչվող հարցեր: Դեսպան Պապիկյանը կարևորեց Սլովակիայում տեղի ունեցած խորհրդարանական ընտրություններից հետո Հայաստանի և Սլովակիայի օրենսդիր մարմինների միջև միջխորհրդարանական կապերի ակտիվացման անհրաժեշտությունը, մասնավորապես երկու խորհրդարանների միջև փորձի փոխանակումը` հանձնաժողովների և բարեկամության խմբերի ակտիվ շփումների միջոցով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր