Դեսպան Արմեն Պապիկյանի հանդիպումը Սլովակիայի Հանրապետության Ազգային խորհրդում

29 ապրիլի, 2021

Ապրիլի 29-ին Բրատիսլավայում տեղի ունեցավ հանդիպում Սլովակիայում ՀՀ դեսպան Արմեն Պապիկյանի և Սլովակիայի Հանրապետության Ազգային խորհրդի նախագահ Բորիս Կոլլարի (Boris Kollár) միջև։

Հանդիպման սկզբում Սլովակիայի Հանրապետության Ազգային խորհրդի նախագահը, ևս մեկ անգամ վերահաստատելով դեռևս 2004թ.-ին Սլովակիայի կողմից Հայոց ցեղասպանության ճանաչումը, իր աջակցությունը և զորակցությունը հայտնեց հայ ժողովրդին։

ՀՀ դեսպանը բարձր գնահատեց 2004թ․ նոյեմբերի 30-ին Սլովակիայի Ազգային խորհրդի կողմից Օսմանյան կայսրությունում տեղի ունեցած Հայոց ցեղասպանությունը ճանաչող և դատապարտող բանաձևի ընդունումը՝ շեշտելով որ այն իր նշանակալի նպաստն է բերում մարդկության դեմ նման ոճրագործությունների կանխարգելման գործում։

Այնուհետև ՀՀ դեսպանը ներկայացրեց ԼՂ հակամարտության շուրջ ներկա իրավիճակը՝ հանգամանալից անդրադառնալով Թուրքիայի, օտարերկրյա ահաբեկիչների և ջիհադիստների անմիջական մասնակցությամբ Ադրբեջանի կողմից Արցախի դեմ սանձազերծած 44-օրյա պատերազմին և դրա ընթացքում Արցախի խաղաղ բնակչության դեմ իրականացրած պատերազմական հանցագործություններին, մինչ օրս Ադրբեջանում պահվող հայ ռազմագերիների և գերեվարված քաղաքացիական անձանց ճակատագրին, Ադրբեջանի կողմից Արցախի գրավյալ տարածքներում հայկական պատմամշակութային ժառանգության ոչնչացմանը և ստեղծված ծանր հումանիտար իրավիճակին։

Դեսպան Պապիկյանը, շնորհակալություն հայտնելով Սլովակիայի Ազգային խորհրդի կողմից 2020թ․ նոյեմբերի 4-ին և 2021թ․ ապրիլի 1-ին ԼՂ վերաբերյալ բանաձևերի ընդունման համար, ընդգծեց, որ այդ բանաձևերը ևս մեկ անգամ վերահաստատում են Սլովակիայի խորհրդարանի սկզբունքային դիրքորոշումը համամարդկային արժեքների աջակցման և մարդասիրական իրավունքի անշեղ իրականացման ու դրանց առաջմղման գործում։

Հանդիպման ընթացքում երկուստեք կարևորվեց Հայաստանի և Սլովակիայի օրենսդիր մարմինների միջև արդեն իսկ ձևավորված ակտիվ համագործակցությունը, այդ համատեքստում ընդգծվեց բարձրաստիճան փոխայցելությունների կարևորությունը, ինչպես նաև երկու խորհրդարանների միջև փորձի փոխանակումը` այդ թվում նաև գործող բարեկամության խմբերի և հանձնաժողովների ակտիվ շփումների միջոցով:

Քննարկվեցին երկու երկրների միջև երկկողմ օրակարգի ընդլայնմանը, փոխադարձ հետաքրքրություն ներկայացնող ոլորտներում հայ-սլովակյան հարաբերությունների զարգացմանն առնչվող հարցեր:

Հանդիպումից հետո Սլովակիայի Ազգային խորհրդի նախագահ Բորիս Կոլլարը և Սլովակիայում ՀՀ դեսպան Արմեն Պապիկյանը այցելեցին Բրատիսլավայում տեղադրված Հայոց ցեղասպանության զոհերի հիշատակը հավերժացնող խաչքար-հուշակոթող, որտեղ հանդիսավոր պայմաններում տեղի ունեցավ ծաղկեպսակների զետեղման արարողություն՝ ի հիշատակ 1915թ. Հայոց ցեղասպանության անմեղ զոհերի։

Հանդիպմանը և ծաղկեպսակների զետեղման արարողությանը սլովակյան կողմից ներկա էին Սլովակիայի խորհրդարանի խոսնակի արտաքին հարցերով խորհրդական Յուրայ Պրիպուտենը (Juraj Priputen), իշխող կոալիցիայի SME RODINA խմբակցության պատգամավոր Լյուդովիտ Գոգան (Ľudovít Goga), արտաքին հարաբերությունների և արարողակարգի վարչության տնօրեն Կատարինա Անդրաշյովան (Katarina Andrassyova), հայկական կողմից՝ դեսպանության առաջին քարտուղար Լուսինե Դավթյանը և Սլովակիայում ՀՀ պատվավոր հյուպատոս Բագրատ Հակոբյանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր