Ավստրիայում և Սլովակիայում ՀՀ դեսպան Արմեն Պապիկյանի ուղերձը Հայաստանի Անկախության օրվա առթիվ

21 սեպտեմբերի, 2022

Սիրելի՛ հայրենակիցներ,

Այսօր Հայաստանի Անկախության տոնն է:

31 տարի առաջ հայ ժողովուրդը վերահաստատեց ազատ ու ինքնիշխան ապրելու իր իրավունքը՝ ի կատար ածելով Հայոց անկախ պետականությունը վերականգնելու մեր վաղեմի երազանքը:

Նվիրական այս օրը մենք նախևառաջ գլուխ ենք խոնարհում մեր բոլոր հերոսների հիշատակի առջև, ովքեր իրենց կյանքը չեն խնայել մեզ ազատություն և արժանապատվություն պարգևելու համար։

Այսօր, երբ ողջ աշխարհն է փոթորկվում բազմաթիվ և լուրջ մարտահրավերներով, աղետալի և խոշոր հակամարտություններով, մեր ազատ ապրելու իրավունքը նորից պաշտպանության կարիք ունի:

Ինքնիշխան ապրելու մեր ձգտումը բոլորն են հարգում՝ բացառությամբ մեր հարևան բռնապետության, որն աշխարհում առաջատար դիրքեր է զբաղեցնում իր իսկ քաղաքացիների իրավունքների ոտնահարման, արյունոտ բռնաճնշումների հարցում: Սեպտեմբերի 13-ին Ադրբեջանի կողմից Հայաստանի ինքնիշխանության և տարածքային ամբողջականության դեմ սանձազերծված լայնամասշտաբ ագրեսիան հայատյացության վրա հիմնված տասնամյակների քաղաքականության հերթական էջն է:

Ես վստահ եմ, որ դարերի արհավիրքների և փորձությունների միջով անցած հայ ժողովուրդը կհաղթահարի նաև այսօրվա մարտահրավերները, որ կրկին սպառնում են մեր պետականությանը, ազգային ինքնությանն ու ապագային:

Սիրելի՛ հայրենակիցներ,

Մեր բոլորի պարտքն է անել մեզնից կախված հնարավորն ու անհնարը մեր առջև ծառացած գոյաբանական վտանգները չեզոքացնելու, մեր հռչակած արժեքներին և նպատակներին տեր կանգնելու համար: Այդ գործում մեր միակ ապավենը, լինելիության մեր ամուր հիմնասյունը պետք է լինի համազգային միաբանությունը և հավաքական կամքը:

Շնորհավորում եմ բոլորիս Հայաստանի Հանրապետության 31-ամյակի կապակցությամբ:

Կեցցե՛ Հայաստանի Հանրապետությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր