ՀՀ մշտական ներկայացուցչության կողմից ՄԱԿ Թմրամիջոցների հարցերով հանձնաժողովի 68-րդ նստաշրջանի շրջանակներում կազմակերպված հարակից միջոցառման վերաբերյալ

12 մարտի, 2025

Մարտի 11-ին ՄԱԿ Թմրամիջոցների հարցերով հանձնաժողովի 68-րդ նստաշրջանի շրջանակներում Վիեննայի միջազգային կազմակերպություններում ՀՀ մշտական ներկայացուցչությունը ՄԱԿ Թմրամիջոցների և հանցավորության դեմ պայքարի գրասենյակի հովանավորությամբ կազմակերպել էր հարակից միջոցառում «Բազմաոլորտ մոտեցման առաջխաղացումը թմրամիջոցների համաշխարհային խնդրի լուծման գործում․ համակարգված ազգային ռազմավարությունների դերը» խորագրով։

Հարակից միջոցառման բանախոսը ՀՀ ՆԳ նախարարի տեղակալ Արմեն Ղազարյանն էր, ով ներկայացրեց ՀՀ կառավարության կողմից մշակված թմրամիջոցների դեմ պայքարի ազգային նոր ռազմավարության ձևավորման հիմնական սկզբունքները, գերակայություններն ու բաղադրիչները՝ թմրամիջոցների օգտագործման տարածման և թրաֆիքինգի դեմ պայքարին զուգահեռ շեշտադրելով վաղ կանխարգելման, ինչպես նաև բուժման, վերականգնման և վերինտեգրման կարևորությունը։

Միջոցառմանը ելույթներով հանդես եկան ՀՀ դեսպան, մշտական ներկայացուցիչ Անդրանիկ Հովհաննիսյանը, ՄԱԿ Թմրամիջոցների և հանցավորության դեմ պայքարի գրասենյակի Եվրոպայի, Արևմտյան և Կենտրոնական Ասիայի ստորաբաժանման ղեկավար Ջերըմի Միլսոմը, հետազոտական վերլուծությունների և լաբորատոր ու գիտական ծառայությունների ստորաբաժանումների ներկայացուցիչներ Տատյանա Յեհլը և Ֆաբիան Լաշին։ Վերջիններս ներկայացրեցին համաշխարհային միտումները, տարածաշրջանային պատկերը, բազմավեկտոր ռազմավարությունների նշանակությունը և մասնավորապես ՀՀ կողմից մշակված նոր ռազմավարության կարևոր առանձնահատկությունները։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր