Մշտական ներկայացուցիչ Անդրանիկ Հովհաննիսյանը ելույթով հանդես է եկել Ատոմային էներգիայի միջազգային գործակալության գլխավոր համաժողովին

16 սեպտեմբերի, 2026

Սեպտեմբերի 16-ին Վիեննայի միջազգային կազմակերպություններում ՀՀ մշտական ներկայացուցիչ Անդրանիկ Հովհաննիսյանը ելույթով հանդես է եկել Ատոմային էներգիայի միջազգային գործակալության (ԱԷՄԳ) Գլխավոր համաժողովի 70-րդ նստաշրջանին։

Դեսպան Հովհաննիսյանը բարձր է գնահատել Հայաստանի և ԱԷՄԳ-ի միջև շուրջ երեք տասնամյակ շարունակ զարգացող համագործակցությունը՝ վերահաստատելով Հայաստանի ամուր աջակցությունը ԱԷՄԳ երաշխիքների համակարգին՝ որպես միջուկային զենքի չտարածման միջազգային ռեժիմի հիմնարար հենասյան։

ՀՀ մշտական ներկայացուցիչն ընդգծել է, որ միջուկային էներգետիկայի զարգացումը Հայաստանի կայուն էներգետիկ ապագայի հիմքերից է, իսկ Հայկական ԱԷԿ-ի անվտանգ և ապահով շահագործումը ՀՀ կառավարության ռազմավարական առաջնահերթություններից է։ Այս համատեքստում նշվել է, որ օրեր առաջ ՀԱԷԿ-ի երկրորդ էներգաբլոկը պլանային տեխնիկական սպասարկման, վերանորոգման, ախտորոշման և ստուգման աշխատանքներից հետո անվտանգ կերպով վերամիացվել է Հայաստանի միասնական էներգահամակարգին։

Անդրադարձ է կատարվել նաև ԱԷՄԳ փորձագիտական և խորհրդատվական առաքելությունների շրջանակներում Հայաստանի շարունակական համագործակցությանը, այդ թվում՝ ԱԷԿ-ների երկարաժամկետ շահագործման անվտանգության ասպեկտների (SALTO) ծրագրին և վերջերս իրականացված պարբերական անվտանգության վերանայմանը։

Դեսպան Հովհաննիսյանը ներկայացրել է ՀԱԷԿ-ի շահագործման ժամկետը մինչև 2036թ. երկարաձգելու ծրագիրը, ինչպես նաև նոր միջուկային էներգաբլոկի կառուցման ուղղությամբ իրականացվող աշխատանքները։ Նշվել է, որ ներկայում Հայաստանը ուսումնասիրում է առկա տեխնոլոգիական տարբերակներն ու միջազգային գործընկերների առաջարկները՝ հատուկ ուշադրություն դարձնելով փոքր մոդուլային ռեակտորների (SMR) տեխնոլոգիաներին։

Ընդգծվել է, որ նոր ատոմակայանի կոնկրետ տեխնոլոգիայի և մոդելի վերաբերյալ վերջնական որոշումը նախատեսվում է կայացնել մինչև 2027թ. ավարտը՝ այդ գործընթացում ապահովելով լիարժեք թափանցիկություն, միջազգային հանրության հետ ժամանակին հաղորդակցություն և Հայաստանի միջազգային իրավական պարտավորությունների լիարժեք պահպանում։

Եզրափակելով՝ ՀՀ մշտական ներկայացուցիչը բարձր է գնահատել ԱԷՄԳ գլխավոր տնօրենի և քարտուղարության գործունեությունը և վերահաստատել Հայաստանի պատրաստակամությունը՝ շարունակելու կառուցողական գործընկերությունը Գործակալության հետ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր