Հայաստանին և Լեռնային Ղարաբաղի բռնի տեղահանված ժողովրդին նվիրված համերգ Բրատիսլավայում

02 նոյեմբերի, 2023

Հոկտեմբերի 31-ին՝ Նիտրայում, նոյեմբերի 1-ին՝ Տռնավայում, նոյեմբերի 2-ին Սլովակիայի մայրաքաղաք Բրատիսլավայում ելույթներով հանդես եկավ «Լույս» ձայնային հնգյակը: Տռնավայի ինքնակառավարման շրջանի նախաձեռնությամբ տեղի ունեցած համերգների շարքը կազմակերպվել էր՝ ի աջակցություն Հայաստանի և Լեռնային Ղարաբաղի բռնի տեղահանված ժողովրդի:

Բրատիսլավայի «Սուրբ ընտանիք» կաթոլիկ եկեղեցում տեղի ունեցած համերգին բացման խոսքով հանդես եկավ Սլովակիայում ՀՀ դեսպան Արմեն Պապիկյանը:

Դեսպանն իր խոսքում շնորհակալություն հայտնեց կազմակերպիչներին հայ ժողովրդին սատարելու, կարեկցանքի, համամարդակային արժեքներին հավատարիմ լինելու համար: «Ցավալի է, որ 21-րդ դարում քաղաքակիրթ ողջ հանրության աչքերի ներքո տեղի ունեցավ մարդկության դեմ հերթական զանգվածային հանցագործությունը: Ադրբեջանն իննամսյա ապօրինի և անմարդկային շրջափակումից հետո սեպտեմբերի 19-ին սկսված լայնածավալ ագրեսիայի միջոցով էթնիկ զտման ենթարկեց Լեռնային Ղարաբաղը՝ իրենց դարավոր պատմական հայրենիքից բռնի տեղահանելով 120 000 հայ բնակչությանը»- նշեց դեսպանը:

Իր խոսքում դեսպանը նաև շնորհակալություն հայտնեց ԼՂ բռնի տեղահանված ժողովրդին հումանիտար օգնության ձեռք մեկնելու՝ միջազգային գործընկերների պատրաստակամության համար:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր