Համերգ նվիրված ֆրանսիական շանսոնի անվանի հայ ներկայացուցիչ Շառլ Ազնավուրին

21 ապրիլի, 2026

Ապրիլի 21-ին Վիեննայի «Porgy&Bess» համերգասրահում մեկնարկեց «Հայաստանի հնչյուններ» երաժշտական փառատոնը, որի շրջանակներում նախատեսվում են եռօրյա միջոցառումներ, այդ թվում` համերգային ծրագրեր և գրական ընթերցումներ` միտված հայկական մշակույթի և երգարվեստի հանրահռչակմանը:

Մշակութային ծրագրի առաջին համերգը նվիրված էր ֆրանսիական շանսոնի անվանի հայ ներկայացուցիչ Շառլ Ազնավուրի ստեղծագործություններին` երգիչ Տիցիանոյի կատարմամբ և Ազնավուրի գործընկեր, դաշնակահար Էրիկ Վիլմսի նվագակցությամբ:

Բացման ելույթով հանդես եկավ Ավստրիայում ՀՀ դեսպան Անդրանիկ Հովհաննիսյանը։ Անդրադառնալով հայ երգարվեստի հարուստ ժառանգությանը, նա նշեց, որ այն աշխարհասփյուռ հայ ժողովրդին կապող ամուր օղակ է և ազգային ինքնության պահպանման գրավական։

Դեսպան Հովհաննիսյանն ընդգծեց, որ Շառլ Ազնավուրը մարմնավորում էր այդ միասնությունը։ Նա հակիրճ ներկայացրեց մեծ երգչի գործունեությունը, մասնավորապես՝ Հայաստանի Հանրապետության զարգացման գործում ունեցած ավանդը։

Համերգաշարի շրջանակներում հնչելու են հայ մի շարք երգահանների ստեղծագործություններ` ավստրիահայ երաժիշտ, ջազմեն Կարեն Ասատրյանի մատուցմամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր