Հայաստանի հարակից միջոցառումը Աբու Դաբիում՝ ՄԱԿ-ի Հանցավորության կանխարգելման և քրեական արդարադատության 15-րդ կոնգրեսի շրջանակներում

27 սեպտեմբերի, 2026

Սեպտեմբերի 27-ին, Աբու Դաբիում ընթացող ՄԱԿ-ի Հանցավորության կանխարգելման և քրեական արդարադատության 15-րդ կոնգրեսի շրջանակներում, Հայաստանի կողմից անցկացվել է «Շրջակա միջավայրի վրա ազդող հանցագործությունների դեմ պայքարի նպաստը գլոբալ բնապահպանական պարտավորությունների իրականացմանն աջակցելու գործում» խորագրով միջոցառումը։

Միջոցառումը կազմակերպվել է որպես Կենսաբանական բազմազանության մասին կոնվենցիայի Կողմերի 17-րդ համաժողովի (COP-17) շրջանակներում նախատեսվող գլոբալ գործընթացի նախապատրաստական քննարկում և մաս է կազմել Կունմին-Մոնրեալի կենսաբազմազանության գլոբալ շրջանակի (KMGBF) առաջին գլոբալ վերանայմանն ուղղված աշխատանքներին։

Միջոցառմանը բացման խոսքով հանդես է եկել ՀՀ արդարադատության նախարար Սրբուհի Գալյանը՝ իր ելույթում ընդգծելով կենսաբազմազանության պահպանության ապահովման գործում քրեական արդարադատության համակարգերի նշանակությունը։

Միջոցառումը վարել է Վիեննայում տեղակայված միջազգային կազմակերպություններում ՀՀ մշտական ներկայացուցիչ, դեսպան Անդրանիկ Հովհաննիսյանը, ով հանդես է եկել նաև ամփոփիչ ելույթով։

Հիմնական ելույթներով հանդես են եկել ՄԱԿ-ի Թմրամիջոցների և հանցավորության դեմ պայքարի գրասենյակի (UNODC) գործառնությունների բաժնի տնօրեն Բո Մաթիասենը և ԻՆՏԵՐՊՈԼ-ի Հետաքննությունների աջակցության գործադիր տնօրեն Սթիվեն Ֆրայը։

Պանելային քննարկմանը ելույթներով հանդես են եկել ՀՀ Արդարադատության նախարարի տեղակալ Աննա Կարապետյանը, Ֆրանսիայի, Գերմանիայի և Պերուի, ինչպես նաև ՄԱԿ-ի Թմրամիջոցների և հանցավորության դեմ պայքարի գրասենյակի, ԻՆՏԵՐՊՈԼ-ի, Եվրոպայի խորհրդի և Շրջակա միջավայրի վրա ազդող հանցագործությունների դեմ պայքարի գլոբալ նախաձեռնության (GI-TOC) ներկայացուցիչները։

Քննարկման շրջանակներում անդրադարձ է կատարվել միջազգային պարտավորությունները` ազգային քաղաքականությունների և քրեական արդարադատության ոլորտի գործնական միջոցառումների վերածելու անհրաժեշտությանը, ինչպես նաև միջազգային համագործակցության ընդլայնման հնարավորություններին։ Ներկայացվել են այս ոլոտում առկա մարտահրավերները և դրանց դեմ պայքարի լավագույն փորձի օրինակները։

Միջոցառման համակազմակերպիչներ են հանդիսացել Ֆրանսիան, Գերմանիան, Պերուն, UNODC-ն, ԻՆՏԵՐՊՈԼ-ը և GI-TOC-ը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր