ՀՀ դեսպանի հանդիպումը Ավստրիայի գյուղատնտեսության, անտառային տնտեսության, կլիմայի և շրջակա միջավայրի պաշտպանության, մարզային և ջրային ռեսուրսների կառավարման դաշնային նախարարի հետ

07 հոկտեմբերի, 2026

Հոկտեմբերի 7-ին Ավստրիայում ՀՀ դեսպան Անդրանիկ Հովհաննիսյանը հանդիպում է ունեցել Ավստրիայի գյուղատնտեսության, անտառային տնտեսության, կլիմայի և շրջակա միջավայրի պաշտպանության, մարզային և ջրային ռեսուրսների կառավարման դաշնային նախարար Նորբերտ Թոչնիգի հետ:

Հանդիպմանն անդրադարձ է կատարվել Հայաստանի կողմից հյուրընկալվելիք Կենսաբանական բազմազանության մասին կոնվենցիայի Կողմերի 17-րդ համաժողովի (COP17) շրջանակներում Հայաստանի և Ավստրիայի միջև ձևավորված արդյունավետ համագործակցությանը:

Դեսպան Հովհաննիսյանը վստահություն է հայտնել, որ Համաժողովը, ներառյալ դրա բարձրաստիճան հատվածը, նոր խթան կհաղորդեն կենսաբազմազանության ոլորտում երկրների կողմից ստանձնված միջազգային պարտավորությունների պատշաճ կատարմանը և կնախանշեն հետագա աշխատանքների ուղղությունները։

Նա ներկայացրել է Հայաստանի նախագահության առաջնահերթությունները` վերահաստատելով ՀՀ հանձնառությունը` ապահովելու համընդգրկուն, բովանդակալից և արդյունավետ քննարկումներ:

ՀՀ դեսպանը բարձր է գնահատել շրջակա միջավայրի կառավարման ոլորտում Ավստրիայի հետ փոխգործակցությունը։ Նա երախտագիտություն է հայտնել Հայաստանում կատարվող բարեփոխումներին ուղղված աջակցության համար և ընդգծել ավստրիական հարուստ փորձը ՀՀ-ում կիրառելու կարևորությունը:

Զրուցակիցները քննարկել են գյուղատնտեսության, ջրային ռեսուրսների կառավարման և բնապահպանական ոլորտներում համագործակցության նոր հնարավորությունները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր