Դեսպան Անդրանիկ Հովհաննիսյանն ընտրվել է ՄԱԿ Անդրազգային կազմակերպված հանցավորության դեմ պայքարի կոնվենցիայի կողմերի համաժողովի 13-րդ նստաշրջանի փոխնախագահ

19 հոկտեմբերի, 2026

Հոկտեմբերի 19-ին Վիեննայում ՀՀ Մշտական ներկայացուցիչ, դեսպան Անդրանիկ Հովհաննիսյանն ընտրվել է ՄԱԿ Անդրազգային կազմակերպված հանցավորության դեմ պայքարի կոնվենցիայի կողմերի (UNTOC) համաժողովի 13-րդ (COP13) նստաշրջանի փոխնախագահի պաշտոնում։ Այդ կարգավիճակում նա նախագահել է համաժողովի ընդհանուր քննարկման նիստերից մեկը։

Նստաշրջանի ընթացքում դեսպան Անդրանիկ Հովհաննիսյանը հանդես է եկել նաև ազգային ելույթով, որով վերահաստատել է Հայաստանի պատրաստակամությունը համագործակցել միջազգային գործընկերների հետ՝ Կոնվենցիայի և դրա արձանագրությունների արդյունավետ իրականացման շուրջ:

Ելույթում մասնավորապես անդրադարձ է կատարվել մարդկանց թրաֆիքինգի, միգրանտների մաքսանենգության և հրազենի ապօրինի շրջանառության դեմ պայքարում Հայաստանի ջանքերին, ներկայացվել են այս ոլորտներում միջազգային համագործակցությամբ ազգային փորձագիտական կարողությունների ամրապնդմանը միտված նախաձեռնությունները։

UNTOC-ը աշխարհում միակ գլոբալ, իրավաբանորեն պարտադիր ուժ ունեցող գործիքն է, որի միջոցով կառավարությունները պարտավորվում են գործել և համագործակցել կազմակերպված հանցավորության դեմ պայքարում։ Համաժողովը գումարվում է երկու տարին մեկ՝ ընդլայնելու կազմակերպված հանցավորության դեմ պայքարելու կարողությունները, վերանայելու Կոնվենցիայի և դրան կից արձանագրությունների իրականացման ընթացքը, ինչպես նաև սահմանելու հանցավորության դեմ պայքարի օրակարգը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր